શેઢે વાવ્યું ગીત

આ ગીત મેં ખેતરને શેઢે વાવ્યું રે,
ચોમાસે ઊગી નીકળે તો કહેજો રે.

ના ખાતર, ના પાણી પાયાં, ના કોઈ વાડ બાંધી,
બસ, બાપુના પરસેવાની એમાં ભેળવી આંધી;
મોર ટહુકે ને ઊઘડે તો સમજજો કે ફાવ્યું રે…
આ ગીત મેં ખેતરને શેઢે…

કૂવા કાંઠે પાણી ભરતી કોઈ પનિહારી ગાય,
તો જાણજો કે મારું ગીત છલકીને ઘેર જાય;
વાછરડું જો કાન માંડે, તો માનજો કે ભાવ્યું રે…
આ ગીત મેં ખેતરને શેઢે…

પરાગ કહે: આ ગીતને નથી જોઈતા મંચ ને તાળી,
એને જોઈએ ભીની માટી, ને ખેડૂતની થાળી;
ભૂખ્યા પેટે કોઈ ગણગણે, તો સમજો અન્ન લાવ્યું રે…
આ ગીત મેં ખેતરને શેઢે…

– પરાગ રતનપરા