હસતાં રહીએ

દુઃખ આવે તો આવવા દઈએ, આંગણ વાગે ઢોલ,
હસતાં હસતાં ઝીલી લઈએ, જેવા એના બોલ.

કાંટો વાગે તો ફૂલ સાંભરે, ઠેસ વાગે તો કેડી,
ભૂખ લાગે તો માની રોટલી, ટાઢ લાગે તો મેડી;
દુઃખનું ગાડું ભારે, પણ આપણો બળદ અણમોલ —
દુઃખ આવે તો આવવા દઈએ, આંગણ વાગે ઢોલ.

આંસુને પણ હાસ્યની ઝાલર પહેરાવીને નચાવીએ,
રાતે અંધારું આવે તો તારા લાખ જગાવીએ;
જીવતર તો છે મેળો, ભાઈ, ખાલી ખિસ્સે ય મોજ અમોલ —
દુઃખ આવે તો આવવા દઈએ, આંગણ વાગે ઢોલ.

પરાગ કહે: આ હસવું એ તો હારેલાની જીત,
દુઃખના દરિયા ઉપર તરતું એક નાનકડું ગીત;
ડૂબવા ના દઈએ હોડી, ભલે ને ઊછળે હિલ્લોળ —
દુઃખ આવે તો આવવા દઈએ, આંગણ વાગે ઢોલ.

– પરાગ રતનપરા