સેટલ

ગામમાં સૌ કહે છે:
‘રમણભાઈનો દીકરો તો સેટલ થઈ ગયો!’

અમેરિકામાં
ત્રણ બેડરૂમ, બે ગાડી,
ને એક કૂતરો —
એનું નામ પણ અંગ્રેજી.

રમણભાઈ
ગામના ઓટલે બેસીને
રોજ સાંજે
ફોનની સ્ક્રીન લૂછ્યા કરે છે,
વીડિયો કૉલની રાહમાં.
ત્યાં દિવસ, તો અહીં રાત;
અહીં દિવસ, તો ત્યાં મીટિંગ.

ગઈ દિવાળીએ દીકરાએ પૂછ્યું:
‘પપ્પા, તમને શું જોઈએ? ઑનલાઇન મોકલું?’
રમણભાઈ કશું બોલ્યા નહીં.
ઑનલાઇન
‘દીકરો’ નામની વસ્તુ
ડિલિવર થતી નથી.

દીકરો સેટલ થઈ ગયો,
ને રમણભાઈ
હજી ઓટલે જ
અનસેટલ્ડ બેઠા છે.

– પરાગ રતનપરા