ઘરડાઘરની ધૂળેટી

ઘરડાઘરના બગીચામાં
ધૂળેટીની સવારે
સૌ ઘરડાં
બાળકોની જેમ રંગે રમે છે.

એક ખૂણે બાંકડા પર
બા અને બાપુજી.

બાપુજીના હાથ ધ્રૂજે છે —
ગુલાલની ચપટી
અડધી હવામાં,
અડધી બાની સાડી પર.

બા હસે છે:
‘પચાસ વરસ પહેલાં પણ
તમારો નિશાનો કાચો જ હતો.’
બાપુજી કહે:
‘ત્યારે ય તું ખસી જતી’તી,
આજે ય.’

ટેબલ પર
દીકરાનો વીડિયો-કૉલ
રણક્યા કરે છે,
ને બંને
એકબીજાની કરચલીઓમાં
ધીરે ધીરે
ગુલાલ ભરે છે.

– પરાગ રતનપરા