વિદાય

તમે શું ગયાં, આજ આંગણ રડે,
હવે બંગડી સાથ કંગણ રડે.

તમે જોઈ જેમાં સજાતાં હતાં,
હવે ધૂળમાં એ જ દર્પણ રડે.

હતી ઢીંગલી, ઘર, રમકડાં બધાં,
હજી ઓરડે એ જ બચપણ રડે.

જુએ રાહ મા ઉંબરે સાંજથી,
પછી આંખમાં રાત-પાંપણ રડે.

તને પત્ર લખવા ઉઠાવી કલમ,
નયનથી ખરી બુંદ, ચંદન રડે.

પરાગે જતનથી ઉછેર્યું હતું,
ગયું ફૂલ, એનું ય ઉપવન રડે.

– પરાગ રતનપરા

#ગઝલ #દીકરી #વિદાય #પિતા #સાસરે #પરાગરતનપરા
#GujaratiGhazal #Daughter #Vidaai #FathersHeart #EmptyHome #ParagRatanpara