શ્રાવણી ઝરમર

ફરી આ શ્રાવણી ઝરમર તમારી યાદ લાવે છે,
પરોઢે મોરનો ટહુકો પુરાણો સાદ લાવે છે.

નિતરતી ઓસરીમાં એકલી બેસી રહું છું ત્યાં,
અચાનક વીજ ઝબકે ને તમારો નાદ લાવે છે.

હવે વરસાદ આવે ને બધે લીલાશ છલકાતી,
મને તો એ જ લીલપ પણ હવે અવસાદ લાવે છે.

નથી ચિઠ્ઠી, નથી કાગળ, કબૂતર પણ નથી આવ્યું,
અષાઢી રાતનો આ મેહ એ ફરિયાદ લાવે છે.

પરાગે સાચવી રાખી હતી જે વેદના મનમાં,
ગઝલ થઈ, એ જ પીડા આજ સૌની દાદ લાવે છે.

– પરાગ રતનપરા

#ગઝલ #શ્રાવણ #વિરહ #વરસાદ #યાદ #પરાગરતનપરા
#GujaratiGhazal #Shravan #Separation #MonsoonMemories #Longing #ParagRatanpara