સામે પાર

ના હલેસાં, નાવ પણ ના, સાદ સામે પાર છે,
પૂર ઘૂઘવતું, છતાં એ નાદ સામે પાર છે.

ના તરાતું, તોય મનમાં ડૂબવાનો ડર નથી,
તોય કૂદું, કેમ કે ઉન્માદ સામે પાર છે.

આ તરફ ઘર, ખેતરો, સગપણ અને રોટી બધું,
આ તરફ છે જિંદગી, પણ સ્વાદ સામે પાર છે.

આ કિનારે માત્ર મારો દેહ છે, છાયા અને
પ્રાણ મારા, શ્વાસ મારા, યાદ સામે પાર છે.

આ પરાગે મ્હેક થઈને ઊડવાનું છે હવે,
ફૂલ આ કાંઠે, અને સંવાદ સામે પાર છે.

– પરાગ રતનપરા

#ગઝલ #પ્રેમ #સમર્પણ #લગની #સાહસ #પરાગરતનપરા
#GujaratiGhazal #CallOfLove #Devotion #LeapOfFaith #Longing #ParagRatanpara