નિજ ધરમ

સાંભળ રે ચેલા, નિજ ધરમની વાત જી,
ભીતર દીવો પ્રગટે તો ટળે અંધારી રાત જી.

નથી ધરમ તિલક-છાપામાં, નથી ભગવે વેશ જી,
પરની પીડા પોતે જાણે, એ જ સાચો ઉપદેશ જી;
કીડીને પણ કણ દે, એની ઊંચી જાત જી…
સાંભળ રે ચેલા…

વેર-ઝેરને વાળી નાખે, રાખે મનને સાફ જી,
ભૂલ કરે જે, એને પહેલાં કરી દે એ માફ જી;
સૌ જીવમાં એક જ જ્યોતિ, ન પૂછે કોઈ નાત જી…
સાંભળ રે ચેલા…

પરાગ કહે: ગુરુ દીવો, ને ચેલો એની વાટ જી,
બળે બંને સાથે ત્યારે ઝળહળે સૌ ઘાટ જી;
ગુરુની કૃપા વરસે, ત્યારે થાય સાચું પ્રભાત જી…
સાંભળ રે ચેલા…

– પરાગ રતનપરા