ના થયું

તેલ ખૂટ્યું છતાં ઝળહળું ના થયું,
રોજ ધોયું હૃદય, ઊજળું ના થયું.

આભમાં ગાજતું, ગડગડે રાતભર,
ખેતરે તો ય એ વાદળું ના થયું.

ઓરડા સાત ને બારણાં સો ભલે,
મન કદી એ ઘરે મોકળું ના થયું.

કેટલી ઠોકરો, કેટલા ઘાવ, પણ
ચામડું તો ય આ પાતળું ના થયું.

આ પરાગે સદા ગંધ વેરી, છતાં
ફૂલ ખરતાં ય મન આકળું ના થયું.

– પરાગ રતનપરા

#ગઝલ #અધૂરપ #આત્મનિરીક્ષણ #સ્થિરતા #જીવન #પરાગરતનપરા
#GujaratiGhazal #Incompleteness #SelfReflection #Equanimity #LifeTruths #ParagRatanpara