મળતું નથી

ફ્લેટ મોટા, લિફ્ટ ઝડપી, આંગણું મળતું નથી,
ડોરબેલો ગાજતી, પણ બારણું મળતું નથી.

હીટરો છે ઓરડે, પણ ગામના એ ચોકનું,
સૌ મળી બેસી શકે, એ તાપણું મળતું નથી.

બાળકો ડે-કેરમાં ને ઑફિસે મા જાય છે,
ગીત ગાતું, ઝૂલતું એ પારણું મળતું નથી.

મૉલમાં સાડી હજારો, બ્રાન્ડ ને લેબલ ઘણાં,
બા તણી ખુશ્બૂ સમેટી ઓઢણું મળતું નથી.

આ પરાગે ગામ છોડ્યું, ને નજર ઝાંખી પડી,
હેતથી માએ ભરેલું આંજણું મળતું નથી.

– પરાગ રતનપરા

#ગઝલ #શહેરીજીવન #ગામ #મા #ઝુરાપો #પરાગરતનપરા
#GujaratiGhazal #CityLife #VillageNostalgia #Mother #LostWarmth #ParagRatanpara