માળો નથી

લીમડો છે એ જ આંગણ, ડાળ પર માળો નથી,
ઓસરી સૂની, હવે ત્યાં કોઈનો ચાળો નથી.

ખેતરો વેચાઈ ગ્યાં, ઊગી ઇમારત ચોતરફ,
આ ઉજાડે શું ખરેખર આપણો ફાળો નથી?

ગામની જ્યાં યાદ આવે, આંખ ભીની થાય છે,
આંસુઓ રોકી શકે એવો કશો પાળો નથી.

જિંદગીની દોર લાંબી લાગતી, પણ શું કહું?
શ્વાસ ને નિઃશ્વાસ વચ્ચે એક પળ ગાળો નથી.

બાગમાં સો ફૂલ ખીલ્યાં, તોય ઝૂરે છે ‘પરાગ’,
એક પણ ત્યાં મા સરીખો હાથ હૂંફાળો નથી.

– પરાગ રતનપરા

#ગઝલ #ગામડું #સૂનુંઘર #વતનઝુરાપો #માનીહૂંફ #પરાગરતનપરા
#GujaratiGhazal #EmptyNest #LostVillage #Nostalgia #MothersWarmth #ParagRatanpara