જગાડી ગયું

નવું એક વ્હાણું જગાડી ગયું,
ચકીનું જ ગાણું જગાડી ગયું.

ધુમાડો હતો ઓસરી-ઓરડે,
સળગતું જ છાણું જગાડી ગયું.

ઉઠાડે મને મા, ‘ઉઠો, દીકરા’,
થયું ગરમ ભાણું, જગાડી ગયું.

હવે ફ્લૅટમાં ઘંટડી રણકતી,
ઘડીનું જ ટાણું જગાડી ગયું.

પરાગે ગુમાવ્યાં પ્રભાતો અસલ,
હવે માત્ર નાણું જગાડી ગયું.

– પરાગ રતનપરા

#ગઝલ #સવાર #ગામનીપરોઢ #મા #શહેરીજીવન #પરાગરતનપરા
#GujaratiGhazal #VillageMorning #Dawn #MothersCall #CityLife #ParagRatanpara