ફ્રિજની સભા

મધરાતે
ફ્રિજમાં સભા ભરાઈ.

કોબીજ બોલી:
‘મને તો અઠવાડિયું થયું,
કોઈ પૂછતું ય નથી.’

લીંબુ ચીમળાઈને બોલ્યું:
‘મને તો લાવ્યા'તા
શરબત માટે,
ને હવે હું જ શરબત જેવું
પાણી પાણી થઈ ગયું છું.’

દૂધની થેલી ધ્રૂજતી હતી:
‘મને તો કાલે સવારે જ
ઉકાળી નાખશે.’

ખૂણામાં બેઠેલી
ગઈ દિવાળીની
મીઠાઈની ડબ્બી
ધીમેથી બોલી:
‘તમે બધાં નસીબદાર છો.
મને તો
કોઈ ખાતું ય નથી,
ને ફેંકતું ય નથી —
બસ, ‘વેસ્ટ નહીં કરવાનું’
કહીને સાચવી રાખે છે.’

ને બારણું ખૂલ્યું.
અજવાળું થયું.
સૌ ચૂપ.

ઘરનો માલિક
પાણીની બાટલી લઈને
પાછો ઊંઘી ગયો.

– પરાગ રતનપરા