દયા છે ક્યાં

છરા, ભાલા, બળેલી બસ, હવે લોહી, દયા છે ક્યાં?
ધરમના નામ પર માર્યા, કહો એનો ખુદા છે ક્યાં?

ધુમાડો આભમાં ફેલ્યો, કબૂતર શ્વાસ ના લેતું,
હવામાં ઝેર ઘૂંટાયું, હવે ચોખ્ખી હવા છે ક્યાં?

ઘવાયો દેવ મંદિરમાં, ઘવાયો પીર દરગાહે,
ચડાવે ફૂલ બંને પર, હૃદયની એ દુઆ છે ક્યાં?

નગરના રાજવી બોલ્યા: ‘અમારો હાથ ક્યાં એમાં?’
ગણે છે માત્ર મત એ તો, કહો માણસ, પ્રજા છે ક્યાં?

પરાગે ફૂલ વાવ્યાં'તાં બળેલી રાખમાં તો પણ,
ઉગાડે પ્રેમ જે, એવી હવે ભીની ધરા છે ક્યાં?

– પરાગ રતનપરા

#ગઝલ #હિંસા #કોમીતોફાન #માનવતા #શાંતિ #પરાગરતનપરા
#GujaratiGhazal #AgainstViolence #Riots #Humanity #Peace #ParagRatanpara