ડાયરીનાં પાનાં

જૂની ડાયરીનાં પાનાં ફરફર ફરફર થાય,
એક સુકાયેલું ગુલાબ, ને આખું વરસ વંચાય.

પહેલે પાને નામ લખ્યું'તું, બીજે પાને તારીખ,
ત્રીજે પાને આંસુ ટપક્યું, શાહી થઈ ગઈ ઝીક;
અક્ષર ધૂંધળા થઈ ગયા, પણ અર્થ નહીં ભૂંસાય —
જૂની ડાયરીનાં પાનાં ફરફર ફરફર થાય.

એક પાને લખ્યું હતું: ‘કાલે મળશું છ વાગે’,
એ કાલ હજી આવી નથી, ને ઘડિયાળ હજી જાગે;
છ વાગ્યાનો ટકોરો રોજ હૈયે આવી ટકરાય —
જૂની ડાયરીનાં પાનાં ફરફર ફરફર થાય.

પરાગ કહે: આ ડાયરી બાળું, તોય ધુમાડો બોલે,
રાખ ઊડીને આંગણ વચ્ચે એ જ કહાણી ખોલે;
કેટલુંક એવું લખાય, જે કદી નહીં ભૂંસાય —
જૂની ડાયરીનાં પાનાં ફરફર ફરફર થાય.

– પરાગ રતનપરા