છાનાં કાગળ

છાનાં છાનાં કાગળ લખું, સંતાડું ઓશીકા નીચે,
પગરવ સાંભળું ત્યાં તો મારું હૈયું ધડકે ઊંચે.

નાની બેની ચોર બનીને શોધી લાવી ચિઠ્ઠી,
આખા ઘરમાં વાંચી બોલી: ‘વાહ રે, કેવી મીઠ્ઠી!’
લાજી મરી હું, ભાભી હસતાં હસતાં ચૂંટી ખેંચે…
છાનાં છાનાં કાગળ…

બાપુ બોલ્યા: ‘આ ઉંમરમાં ધ્યાન દેજે ભણતરમાં’,
મા કંઈ ના બોલી, પણ રાતે આવી મારા ઘરમાં;
માથે હાથ ફેરવી બોલી: ‘વાંચું ના, બસ રાખજે નીચે…’
છાનાં છાનાં કાગળ…

પરાગ કહે: આ કાગળિયાં તો હૈયાનાં છે ફૂલ,
સંતાડો તો ય મ્હેકી ઊઠે, એ જ એની ભૂલ;
પ્રેમ તો ગાલ ઉપર લાલી થઈ આપોઆપ જ પહોંચે…
છાનાં છાનાં કાગળ…

– પરાગ રતનપરા