આંખમાં

હોઠ ના બોલે કશું, બોલે ઇશારો આંખમાં,
ડૂબતો’તો, ત્યાં જ દીઠો મેં કિનારો આંખમાં.

ગામથી પરદેશ ગ્યો જે, દીકરાની રાહમાં,
માવડીના એ જ સઘળો છે સહારો આંખમાં.

ચાર ભીંતો, બંધ બારી, સાવ સૂનો ઓરડો,
તોય તું જ્યાં યાદ આવે, ત્યાં નજારો આંખમાં.

ભૂખ ને અન્યાયથી આખું નગર મૂંગું થયું,
તોય સળગે છે હજી પણ એ તિખારો આંખમાં.

રાનમાં, વનમાં, ભટકતો હું પવનમાં, ઓ ‘પરાગ’,
આખરે જોયું, હતો મારો ઉતારો આંખમાં.

– પરાગ રતનપરા

#ગઝલ #આંખ #ઇશારો #માનીપ્રતીક્ષા #તિખારો #પરાગરતનપરા
#GujaratiGhazal #Eyes #UnspokenLove #MothersWait #SparkOfRevolt #ParagRatanpara