ત્રાજવે

કેમ તોળી શકો લાગણી ત્રાજવે?
કે ચડાવી શકો માગણી ત્રાજવે?

જિંદગી ખેતરે પાથરી ખેડુએ,
શેઠનો ભાવ, ને વાવણી ત્રાજવે.

દીકરી સાસરે મોકલી તો, તહીં
ભાર સોના તણો, ઓઢણી ત્રાજવે.

એક મા જાગતી, દીકરો સરહદે,
રાજના ખેલમાં છાવણી ત્રાજવે.

મ્હેક તોળાય ના કોઈ ભાવે, ‘પરાગ’,
કોણ મૂકે ભલા ચાંદણી ત્રાજવે?

– પરાગ રતનપરા

#ગઝલ #ત્રાજવું #લાગણી #ખેડૂત #દહેજ #પરાગરતનપરા
#GujaratiGhazal #WeighingFeelings #FarmersPlight #DowrySatire #PricelessThings #ParagRatanpara