સંતાય છે

મ્હેક જેવી કોઈ પીડા બાગમાં સંતાય છે,
ને ઠરેલી રાખ જેવું આગમાં સંતાય છે.

ગીત ગાયું ગાયકે ને ઝૂમતા સૌ ઘર ગયા,
કોણ જાણે, ડૂસકું એ રાગમાં સંતાય છે.

લાલ પીળા રંગથી ભીંજાય આખું ગામ પણ,
એક વિધવાનું સફેદ જ ફાગમાં સંતાય છે.

સંત ભગવામાં વિરાજે, ને કહે ‘છોડો બધું’,
કેટલો વેપાર એના ત્યાગમાં સંતાય છે!

પૂર્ણિમાની ચાંદની પર સૌ ફિદા છે, પણ ‘પરાગ’,
ચાંદની અડધી ય એના દાગમાં સંતાય છે.

– પરાગ રતનપરા

#ગઝલ #વિરોધાભાસ #છુપીપીડા #હોળી #દંભ #પરાગરતનપરા
#GujaratiGhazal #HiddenPain #Paradox #Hypocrisy #BeautyAndFlaw #ParagRatanpara