સંકેત

વાળમાં આવી સફેદી, સાંજનો સંકેત છે,
તાર ઢીલા, તૂટતા એ સાજનો સંકેત છે.

દીકરો પૂછે નહીં, પણ હાથ પકડે દાદરે,
આ મમતની લાગણી કે રાજનો સંકેત છે?

બોલતો ઓછું, વધારે સાંભળું છું આજકાલ,
આ વિનય છે કે પછી કો લાજનો સંકેત છે?

માન, માળા, શાલ ઓઢાડી, વિદાયે સૌ ગયા,
શાલ શેની? એ ઉતરતા તાજનો સંકેત છે.

પાનખર આવી, પરાગે ફૂલને પૂછ્યું હસી;
‘એ ખરે છે તો નવા કો આજનો સંકેત છે.’

– પરાગ રતનપરા

#ગઝલ #ઘડપણ #નિવૃત્તિ #જીવનનીસાંજ #વ્યંગ #પરાગરતનપરા
#GujaratiGhazal #Aging #Retirement #EveningOfLife #SignsOfTime #ParagRatanpara