સાંભળે

દૂરથી હું સાદ પાડું, ક્યાં કિનારો સાંભળે?
નાવ તૂટી, ને હવે કોનો સહારો સાંભળે?

રાતભર મેં ચાંદ સામે ગીત ગાયાં, તે છતાં
આભનો ક્યાં કોઈ એકાકી સિતારો સાંભળે?

આંખથી તેં જે કહેલું, તે ગઝલમાં ક્યાં લખું?
ભીડ સમજે શબ્દ બસ સૌ, ના ઇશારો સાંભળે.

આરતી, ઘંટા, નગારાં, લાઉડસ્પીકર બધે,
ભૂખનું રડવું હવે ઈશ્વર બિચારો સાંભળે?

આ પરાગે સાદ પાડ્યો ફૂલ થઈને, શું ખબર,
કોઈ ભમરો, કોઈ પંખી કે નજારો સાંભળે.

– પરાગ રતનપરા

#ગઝલ #સાદ #એકલતા #મૌનનીભાષા #પ્રાર્થના #પરાગરતનપરા
#GujaratiGhazal #UnheardCall #Loneliness #LanguageOfSilence #Prayer #ParagRatanpara