પછી

ઘડો તો બને છે ટિપાયા પછી,
ઝગે હીરલો પણ ઘસાયા પછી.

નથી વાંસળીને ખબર સૂરની,
મધુર ગાય છે એ છિદાયા પછી.

હરી પાંદડી પણ હથેળી ઉપર,
રચે લાલ રંગો પિસાયા પછી.

વધે વૃક્ષ ઊંચું, ઘટાદાર થઈ,
નવી ડાળ ફૂટે કપાયા પછી.

પરાગે ય મ્હેક્યો હવામાં ખરો,
હૃદયમાં હજારો ઘવાયા પછી.

– પરાગ રતનપરા

#ગઝલ #સંઘર્ષ #કસોટી #ઘડતર #પીડા #પરાગરતનપરા
#GujaratiGhazal #TrialByFire #Resilience #GrowthThroughPain #Perseverance #ParagRatanpara