લોકો

હતા જે ગામમાં ભોળા, ગયા ક્યાં એ ભલા લોકો?
નગરમાં સૌ મુખોટામાં, ન ઓળખતા સગા લોકો.

વસીયત ખોલતાં સૌએ ઝઘડવા થઈ ગયા ભેગા,
મરણ ટાણે ન દેખાયા, હવે આવ્યા ‘ખરા’ લોકો.

દિવાલો ગામમાં ચણતા, ગલી ધર્મે વહેંચીને,
ખુદાના નામ પર લડતા, જુઓ કેવા બધા લોકો!

ઘરે ઘરડાં, વિદેશે પુત્ર, ને બસ વીડિયો કૉલે
‘મજામાં?’ પૂછતા રોજે, મજાના આ નવા લોકો.

પરાગે દીવડો લઈને દિવસ આખો ફરી જોયું,
હતી ભીડો ઘણી, ત્યાં ક્યાં હતા માણસ? ઘણા લોકો!

– પરાગ રતનપરા

#ગઝલ #વ્યંગ #માણસાઈ #સગપણ #ભીડ #પરાગરતનપરા
#GujaratiGhazal #Satire #LostHumanity #Relatives #CrowdButNoHumans #ParagRatanpara