હું શું કરું?

ચાંદને આકાશમાં બસ જોઈને હું શું કરું?
સાત દરિયાને કિનારે રોઈને હું શું કરું?

મેલ મનમાં હોય તો ગંગા ય શું કરશે ભલા?
હાથ-પગ સો વાર જળથી ધોઈને હું શું કરું?

જીતવાની હોડમાં હું જાતને ભૂલી ગયો,
વિશ્વ પામું, પણ પછી ખુદ ખોઈને હું શું કરું?

મ્હેલ, સોનું, ચાકરો સૌ, પણ નથી મા પાસમાં,
એ વિના રાજા ખરો પણ હોઈને હું શું કરું?

આ પરાગે શ્વાસની માળા અધૂરી પણ ભલી,
ફૂલ બીજાનાં હવે તો પ્રોઈને હું શું કરું?

– પરાગ રતનપરા

#ગઝલ #આત્મચિંતન #મા #સાદગી #આંતરશુદ્ધિ #પરાગરતનપરા
#GujaratiGhazal #SelfReflection #Mother #InnerPurity #Humility #ParagRatanpara