ભીંત

બે ઘર વચ્ચે
એક ભીંત છે.
ત્રીસ વર્ષ જૂની.

જમીનના એક વેંત માટે
બે ભાઈઓ
કોર્ટે ચડ્યા હતા.
ત્યારથી
બંને ઘરનાં બારણાં
એકબીજાની વિરુદ્ધ દિશામાં ખૂલે છે.

ગઈ કાલે
આ બાજુના છોકરાનો દડો
ભીંત કૂદીને
પેલી બાજુ પડ્યો.

થોડી વાર
કશું ના થયું.

પછી
ભીંત ઉપરથી
દડો પાછો આવ્યો —
સાથે
એક નાનકડા હાથે લખેલી ચિઠ્ઠી:
‘કાલે પણ રમશું?’

ભીંત હજી ઊભી છે.
પણ હવે
એની ઉપરથી
રોજ
દડો આવ-જા કરે છે.

ભીંતોને પાડવા
હંમેશાં હથોડા નથી જોઈતા.

– પરાગ રતનપરા