ભીંજવે

આજ આ વરસાદ મારા આંગણાને ભીંજવે,
ઝૂંપડીમાં એક જૂના ઓઢણાને ભીંજવે.

આભ આખું ઊતરે છે છાપરાની ફાટમાં,
જાગતી મા, રાતભર આ પારણાને ભીંજવે.

તું સદા ગાતો રહે વરસાદનાં ગીતો ભલે,
કોઈના ચૂલા તણા એ તાપણાને ભીંજવે.

આ તરફ મલ્હાર ગાતી ગોઠડી ચાલી રહી,
ને ગરીબોના ઉઘાડા બારણાને ભીંજવે.

છો ‘પરાગે’ બંધ બારી, બારણાં રાખ્યાં, છતાં,
પારકી પીડા જ આખર આપણાને ભીંજવે.

– પરાગ રતનપરા

#ગઝલ #વરસાદ #ગરીબી #ઝૂંપડી #સંવેદના #પરાગરતનપરા
#GujaratiGhazal #Monsoon #Poverty #LeakingRoof #Empathy #ParagRatanpara