અફવા

આ જમાનો રોજ બોલે છે, વફા અફવા હતી,
ને પુજારી પણ કહે છાનું, ખુદા અફવા હતી.

એક છાંયો, બે જણાં, ને સાંજનો ઢળતો પવન,
શું પછી થ્યું? એ ગલીની આ હવા અફવા હતી.

એક ચોકે આ સળગ્યાં બેઉ જણ, ને ત્યાર બાદ
ગામ બોલ્યું: ‘એમની તો એ સજા અફવા હતી.’

ફોન પર સૌ ડૉક્ટરો થઈ ગ્યા, કહે છે આ બધા:
‘લીમડો ચાવો, ઉકાળો લ્યો, દવા અફવા હતી!’

જે પરાગે સત્ય ગાયું, એ ય લોકો બોલશે:
‘આ ગઝલમાં જે લખી છે, એ કથા અફવા હતી!’

– પરાગ રતનપરા

#ગઝલ #વ્યંગ #અફવા #પ્રેમકથા #સમાજ #પરાગરતનપરા
#GujaratiGhazal #Satire #Rumours #ForbiddenLove #FakeNews #ParagRatanpara